علقت الفنانة مي عمر، على أقاويل الفنانة فريدة سيف النصر عن مسلسل رانيا وسكينة، الذي شاركت فيه أمام الفنانة روبي، قائلة: «لما والدي تعب كانت فترة وعدت وهو كويس الحمدلله واضطرينا نسافر وقعدنا فترة كبيرة برة والموضوع كان خطر ومجهد نفسيًا، ووالدي بيحب الفن وبيحترمه وبيشجعني جدًا، وحماتي من أكتر الناس اللي بتشجعني برضو، ولو فيه مشكلة بيننا بتقف معايا انا مش معاه هو».
وقالت مي عمر، خلال استضافتها ببرنامج «أسرار» مع الإعلامية أميرة بدر المذاع على قناة النهار: «استغربت لما سمعت كلام أستاذة فريدة سيف النصر عن مسلسل رانيا وسكينة، وهي فنانة مهمة جدًا، وأنا وروبي أصحاب جدًا، ومفيش مرة اختلفنا في وجهات النظر، ولما المسلسل خلص زعلنا علشان مش هنشوف بعض كتير تاني، ومعرفش إزاي فريدة سيف النصر قالت كدة».
يذكر أن الفنانة فريدة سيف النصر قالت في تصريحات صحفية بعد مسلسل ريا وسكينة: «مبقاش فيه مخرجين زي زمان وبيجيبوا عيال صغيرة تخرج ومش مهنتهم الأساسية، زي مسلسل»رانيا وسكينة«المخرجة مكنتش عارفة تسيطر على الفنانين ولا التصوير».
أضافت: «كان بيحصل خلافات في كواليس المسلسل وروبي ومي عمر بيسيبوا اللوكيشن وأنا قاعدة مستنياهم مع إن مشاهدي كانت قليلة في المسلسل، ومعظم المخرجين حاليًا مش متمكنين زي زمان ما عدا عدد قليل منهم، والمخرج بيكون مش فاهم حاجة وأنا اللي بقوله أعمل إيه وخد بنصيحتي، والجيل الجديد فيه حاجة غلط وكل واحدة تعمل مسلسل ولا فيلم تفتكر نفسها نجمة».
